MANDAUE CITY-Misaway ang mga pundok sa mga lumulupyo sa Barangay Labogon sa dakbayan sa Mandaue ngadto kang Dismissed Mandaue City Mayor Jonas Cortes diin gipasanginlang nila kining “bakakon” kabahin sa isyu sa Suprea Ready Mix Concrete Batching Plant nga nag-operate sa ilang lugar.
Gibuhat sa grupo ang ilang pamahayag sa usa ka press conference sa usa ka restaurant sa AS Fortuna St. Barangay Banilad, dakbayan sa Mandaue kagahapong adlawa sa Biyernes, Pebrero 7, 2025.
Kung kahinumduman nga mi-deny ang Office of the Ombudsman sa motion for reconsideration nga gi-file sa kampo ni Cortes diin napatigbabaw niini ang ruling sa pagkataktak sa mayor sa alegasyong kapakyas pagpahunong sa illegal nga operasyon sa cement batching plant sa Barangay Labogon niadtong tuig 2020 hangtud 2022.
Matod pa sa usa ka miyembro sa maong grupo nga si Ines Necessario diin mipadayag sab kini sa ilang habig sa mga sakop sa tigbalita diin niadtong panahona kay hilabhang kadaot sa kalawasan ang ilang nasinati tungod sa operasyon sa maong planta.
Dugang pa niini nga bisan pa niadtong 2019 kay misuway na sila padayag sa buhatan sa Mayor sa administrayon ni Cortes kabahin sa ilang sugilanon apan wala lang daw kini gitagad.
