Nipadayag sa ilang kabalaka ang pipila ka mga progresibong organisasyon pinaagi sa pagpahigayon og protesta paingon sa opisina sa Department of Energy (DOE) uban usab sa mga konsumidor sa kuryente gikan sa Mandaue, Cebu, ug Dakbayan sa Talisay.
Sumala sa miyembro sa national steering committee sa Power for People coalition (P4P), nga si Teody Navea, ang publiko nanginahanglan og klaro nga mga tubag ug solusyon bahin sa yellow ug red alert grid status nga nasinati sa tibuok rehiyon.
Nahimo usab nga usa ka plataporma ang protesta sa pipila ka mga business owners nga nipadayag sa ilang kabalaka, sama sa nahinabi sa Bombo Newsteam nga si Manilfa Soniega usa ka tag-iya sa negosyo sa frozen food sa Mandaue City, diin gipaambit niini nga napugos siya sa paglabay og anaa sa 10 ka kilo nga hotdog ug uban pang frozen nga produkto tungod sa balik-balik nga rotational brownouts.
Si Soniega, kinsa usa usab ka urban poor ug representante sa KPML, miapil sa martsa paingon sa DOE aron manawagan og mas maayong aksyon taliwala sa padayon nga pagkawala sa kuryente.
Nanawagan usab siya alang sa usa ka hingpit nga imbestigasyon sa mga rotational brownouts ug alang sa mga naapektuhan nga mahatagan og hustisya ang ilang mga kapildihan.
