CEBU CITY- Nipahigayon ug press conference ang 13 ka mga kooperatiba ubos sa Federation of Cebu Transport Cooperatives (FCTC) aron moduyog sa 3 ka adlaw nga transport rally nga gipangulohan sa Manibela group sa ilang reklamo bahin sa Public Transport Modernization Program (PTMP) nga gipahigayon kagahapon, Lunes, Marso 24, 2025.
Ang maong panagtapok gipangamahanan ni FCTC Chairperson Ellen Maghanoy, diin matod niya nga ang nasangpit nga programa nagsugod niadtong 2018 apan wala pa kaayo klaro ang mga probisyon niini nga makaapekto sa gatusan ka indibidwal nga sektor sa transportasyon.
Gidugang pa niini nga ang ilang kooperatiba mismo ang komitado sa nasangpit nga programa ug nakagasto na kini og mga puhunan ug nakamugna og trabaho sa dili mominus 5,000 ka numero.
Bisan og wala sila moapil sa transport strike aron dili makahasol sa mga sumasakay sa Sugbo, gisuportahan gihapon nila ang mga mulo sa publikong sektor sa Sugbo.
Gipadayag usab niini ang kabalaka sa kasamtangang administrasyon, ilabina nga aduna nay bag-ong kalihim ang Department of Transportation, kung makapadayon ba sa hustong paagi ang modernization program sa mga pampublikong sakayan.
Nasayran usab nga moabot ngadto sa P3-bilyones ang utang sa mga kooperatiba sa pagpatuman sa maong programa sa Sugbo lamang.
