CEBU – Irekomendar sa kapulisan sa Cebu City ngadto sa Police Regional Office in Central Visayas (PRO-7) ang pagpatuman sa gun ban sa dakbayan ug sa ubang bahin sa Metro Cebu atol sa pagsaulog sa Sinulog 2023.
Kini ang gibutyag ni Police Lieutenant Colonel Janette Rafter, deputy director for operations sa Cebu City Police Office (CCPO), nga ilang girekomendar nga sugdan ang gun ban labing menos usa ka semana sa dili pa ang opisyal nga pagsugod sa mga kalihukan sa Sinulog.
Matud pa ni Rafter nga padayon usab ang diskusyon sa mga opisyal sa dakbayan sa panginahanglan sa pagpatuman sa liquor ban sulod sa venue sa mga kalihukan sa Sinulog, o labing menos sulod sa 300 metros nga radius.
Dugang pa nga nahisgutan na usab nila ang pagbaton og signal jammer atol sa Sinulog grand parade apan magdepende kini sa ilang threat assessment sa unahan.
Samtang sa habig ni Police Brigadier General Roderick Augustus Alba, PRO-7 director, nga makig-alayon usab sila sa mga organizers kon sa unsang paagi ang ideya sa signal jamming makaapekto sa mekaniko sa mga organizers sa kultural ug relihiyoso nga mga kalihokan.
Sa pagkakaron, si Alba niingon nga padayon nilang gitapos ang pagpangandam sa seguridad alang sa Sinulog 2023 ug gipaabot nga sa Disyembre 15 pa, matukod na ang ilang multi-agency coordinating center, diin ilang gihimo ang ilang monitoring.
Matod ni Alba nga ilang gipaabot nga madoble o matriple ang mga tawo atol sa maong dakong kalihukan. Mao nga apil sa pagpangandam ang mga polis gikan sa ubang probinsya sama sa Negros, Bohol ug Siquijor.
Kung gikinahanglan, mangayo sila og augmentation gikan sa ubang mga rehiyon, gimandoan usab niya ang iyang mga tawo nga dili mobiya sa ubang mga lugar, bisan kung ang mga dagkong kalihokan mahitabo sa South Road Properties.
