CEBU CITY-Patay ang usa ka guwardiya human gipusil sa wala pa mailhi ng mamumuno sa may Sitio Kawayan, Lahug, dakbayan sa Sugbo.
Giila ang biktima nga si Wilfredo Sarsaña, 47 anyos, lumad nga taga Mabinay, Negros Oriental apan kasamtangang nagtrabaho sa may Mango Avenue niining dakbayan isip security guard.
Matud sa hepe sa Mabolo Police Station nga si Police Senior Inspector Dindo Alaras basi sa imbestigasyon, girelibohan ang biktima sa ilang head guard ginganlang “Villa” sanglit boot ihatud ni Sarsaña ang iyang anak sayo sa terminal para makpauli sa Negros ug plano niini nga matulog sa South Bus Terminal. Apan giingnan matud pa kini ni Villa nga adto nalang matulog sa Lahug sa ilang guard house.
Saysay pa usab sa anak sa biktima nga si Christine Sarsaña,19 anyos nga sa dihang pasulod na siya sa guard house sunod sa iyang amahan kalit nga nakabati siya og duha ka boto ug nakita nalang niini ang iyang amahan nga nahagba na ug nalunang sa iyang kaugalingog dugo.
Nasayran usab nga nasayod sila daan nga dunay kaaway si Villa ug dako ang iyang pagtoo nga na-aan lang ang iyang amahan atol sa pagpamusil.
Naka-angkon ug igo sa bukton ug sa dughan ang biktima samtang narekober usab sa kapulisan ang 2 ka empty shells sa crime scene.
