CEBU – Patay diha-diha dayun ang usa ka drayber sa habalhabal human kini gipusil sa wa pa mailhing tawo, sa Sitio Bajac, Barangay Poblacion, lungsod sa Liloan, Sugbo, Biyernes sa buntag, Septiyembre 9, 2022.
Nagpaabot sa iyang anak sa gawas sa botika ang biktima nga si Eliseo Abendan, 46, taga Purok Mansanitas, Sitio Cogon, Barangay Poblacion, Liloan, dihang gipusil og kalit mga alas 11:45 sa buntag.
Nakaangkon siya og samad pinusilan sa ulo ug lawas.
Matud pa ni Police Senior Master Sergeant Richard Y. Ares, Investigator sa Liloan Police Station, nga basi sa inisyal nga imbistigasyon, ilahang nasuta nga personal ang rason sa pagpamusil sa biktima.
Giduol sa gunman ang biktima ug gipusil si Abendan sa makadaghang higayon, nga giigo gyud mismo sa iyang ulo ug nakita sa crime scene ang pito ka walay sulod nga kabhang sa calibre 45 pistol.
Nagpadayon ang imbestigasyon sa kapulisan, apan ilahang gidili ang pagbutyag sa pangalan sa suspetsado, arun sa malampuson nga imbistigasyon.
Kasamtangang nakaikyas ang gunman sakay sa usa ka motorsiklo.
