CEBU PROVINCE-Gitulis patay ang usa ka habal-habal driver sa Sitio Manlubog, Barangay Ipil, lungsod sa Carmen, amihanang Sugbo mga ala 1 sa kaadlawon Huwebes, Marso 2, 2023.
Giila ang biktima nga si Gilbert Albaño Basan, 41, residente sa Sitio Manlubog, Barangay Ipil.
Ang mamumuno nga gituohang gikan sa maong lugar padayon pa nga gawasnon.
Sa pakighinabi sa Bombo Radyo Cebu ni Police Major Eric Gingoyon, ang hepe sa Carmen Municipal Police Station, gibutyag niini nga ang biktima nipauli human sa trabaho dihang gi-atangan sa wala pa mailhing mamumuno sa usa ka kasagbotan.
Matud pa nga kinahanglan nga biyaan sa biktima ang iyang motorsiklo kay nahimutang ang ilang balay sa bungtod ug ang pamaagi lang nga maka-abot sa lugar kay ang pag-agi sa usa ka hilit ug hilom nga lugar.
Si Basan nakaangkon og tulo ka samad dinunggaban sa iyang dughan.
Gituohan sa kapulisan nga tulis ang motibo sa insidente sanglit nahanaw na ang sling bag sa biktima nga adunay sulod nga P24,000.
Sigon pa sa anak sa biktima nga niadtong Miyerkules lang gi-claim sa ilang amahan ang kuwarta nga gipadala sa iyang asawa nga nagtrabaho sa gawas sa nasud.
Posibling nasayod ang mamumuno nga nagdala og dakong kantidad ang biktima.
