CEBU CITY-Gi-awhag sa ni Cebu Provincial Governor Gwendolyn Garcia ang mga local executives sa tagsa-tagsa ka mga munisipalidad sa probinsya sa Sugbo nga tagaan og trabaho ang mga habal-habal og tricycle drivers nga wala na kapamasahero gumikan sa Enhanced Community Quarantine.
Mamahimo matud pa kini sila nga makasuporta sa mga lumulopyo sa tagsa-tagsa nila ka mga barangay o lungsod pinaagi sa paghatud ug pangompra sa mga pagkaon gamit ang ilang motor.Kini ang mamahimo usab nga sugoon nga mupalit sa mga kan-anan og pagkaon aron nga kini sila duna usab income.
Una na usab nga gisugyot sa gobernadora nga mamahimong magbutang ang matag LGU ug ‘bagsakan center’ ingon man sa mga barangay aron nga didto nalang mamalit ang mga residente. Ang pamaagi usab niini mamahimo nga gamiton ang usa ka public utility vehicle nga pakyawon para maoy gamitong sakyanan sa pagpangompra.
‘Vehicle Quarantine Pass’
Sa laing bahin, sa hisgutanan usab sa sakyanan atol sa ECQ, manginahanglan kini og vehicle quarantine pass (VQP) kung mugawas ug musulod sa borders.
Apan kining maong mga sakyanan ang gamiton lamang nga ‘service’ para sa mga essential employees ug front liners. Mamahimo usab kini nga magamit sa jurisdiction lamang sa probinsya.
Apan kung kini musulod na sa border ilabina sa Cebu City ug wala nalakip sa exemptions dili pwede magamit ang (VQP).
