Giuyunan sa Hamas ang sugyot sa Israel nga ceasefire sulod sa 60 ka adlaw. Matod pa sa Egyptian official, lakip na sa kasabutan ang pagpagawas a Katunga sa mga bihag nga gikuptan sa Gaza, ug ibaylo sa pipila ka Palestinian nga mga binilanggo.
Ang maong kasabutan gikumpirma sa senior nga opisyal sa Hamas nga si Basem Naim ang pag-uyon sa grupo, gani giingon sa Hamas nga ang ubang mga factions sa Palestinian nagpahibalo sa mga tigpataliwala sa ilang pag-uyon usab.
Nunot sa plano sa Israel sa pag-ilog sa control sa Gaza City ngadto sa Palestinian enclave, mao ang nahimong hinungdan nga napukaw ang alarma diin ang 10,000 ka mga Israeli kaniadtong Domingo, nipahigayon og protesta sukad nagsugod ang gubat, ug nag-awhag sa usa ka kasabutan nga tapuson ang away ug buhian ang nahabilin nga 50 ka mga hostages nga gihuptan sa Gaza sukad sa pag-atake sa Hamas kaniadtong Oktubre 7, 2023.
Sa nasangpit nga mga hostage, adunay 20 niini ang buhi pa, ug duha ka batch ang buhian sulod sa 60 ka adlaw nga ceasefire hangtod nga makab-ot ang permanente nga ceasefire.
Naglaum ang mga tigpataliwala nga motubag usab ang Israel, nga kaniadto giingon nga mouyon lang kung buhian ang tanan nga mga hostage.
