CEBU CITY – Masinati na ang kusug nga hangin ingun man ang pagtutaligsik sa Sugbo.
Subay niini, kanselado na ang tanang klasi sa mga pangpubliko nga tunghaan karung adlawa.
Halos nagdungan nga nagdeklarar ug suspensyon sa klasi ang mga local chief executives sa Cebu City, Mandaue City ug Lapu-Lapu City kagahapun kung diin giawhag usab nila ang mga school administrators sa mga pribado nga tunghaan nga isuspenso na usab ang ilahang mga klasi alang na usab sa kaluwasan sa tanan bisan pa man ug dili direkta nga mu igu sa Cebu ang bagyong Ompong.
Giklaru usab sa mga mayor sa nahisgutang syudad nga adunay trabaho ang mga empleyado sa gobyerno ug kini ang mutabang sa monitoring sa matag barangay ilabi na sa mga mountain barangays.
Naka-standby na usab ang ilahang mga government vehicles ilabi na ang mga bus alang sa mga stranded nga pasahero kung ugaling adunay pagbaha.
Sa probinsiya sa Sugbo, gipadayag ni Cebu Provincial Governor Hilario Davide III nga ihatag na niini ang desisyon sa mga opisyal sa nagkadaiyang kalungsuran ang pagdeklarar ug walay klasi sa mga tunghaan sa probinsiya.
Samtang, sugud kagahapong adlawa, wala na gitugutan sa Philippine Coast Guard-Cebu Station nga makabyahe ang tanang mga barko.
