Nipahamtang og 90-day preventive suspension ang Land Transportation Office (LTO)-7 sa driver’s license sa usa ka motorista human kini nag-viral sa iyang delikado nga “Superman” stunt sa dalan, diin gipadad-an og Show Cause Order ang suspetsado nga giilang si Kyle Econas, o nailhan sa online isip “Boi Superman,” human nakuhaan og video ang iyang binuhatan sa Transcentral Highway niadtong Pebrero 16, 2026.
Sa maong video, makita si Econas nga nisundog sa lupad ni Superman samtang nagmaneho sa iyang motor (plate number G953JZ), butang nga niresulta sa pagkabangga sa laing motorsiklo ug naghatag og peligro sa ubang mga motorista ug pedestrians.
Subay niini, eksklusibong nahinabi sa Bombo Radyo Cebu News Team si
Francisco “Franz” Ranches Jr., Officer in charge sa Land Transportation Office 7, iyang gikompirmar nga niluwat na sila og Show Cause Order batok kang Econas, diin karong adlawa, Pebrero 18, himuon na ang hearing kabahin niini.
Gani, gitataw ni Ranches pipila sa mga violations nga giatubang karon sa suspetsado mao ang “Reckless driving” ug ang “Being an improper person to drive,” ug gihimug-atan ang pag rekomendar sa revocation sa lisensya niini.
Ingun man nga giklaro usab ni Ranches ang hinungdan og nganung gipagawsan og show cause order si Econas tungod sa peligro niini nga nahatag sa pampublikong kadalanan.
Apan wala gisalikway nga magsubay kini sa due process, hinungdan nga adunay hearing nga ipahigayon karong adlawa, aron nga tagaan kinig kahigayonan nga ipasabot ang iyahang habig.
