Mibalik na ang operasyon sa Heathrow Airport sa London human sa pagkawala sa kuryente tungod sa dakong sunog nga miulbo duol sa electrical substation nga nakabalda sa biyahe sa kapin 200,000 ka mga pasahero.
Sumala sa British Airways, 8 sa ilang nalangan nga mga biyahe mibiya na gikan sa airport sa Heathrow niadtong Biyernes sa gabii.
Bisan pa, sumala sa UK flag carrier, gilauman nga mi-operate lamang sa 85% nga kapasidad gahapong adlawa ug gitambagan ang mga pasahero nga magdahum nga malangan pa ang ilang mga flight sa umaabot nga mga adlaw.
Gianunsyo usab sa Air Canada ug United Airlines ang pagpadayon sa ilang gikatakda nga mga biyahe paingon ug gikan sa airport sa Heathrow.
Gikataho usab sa London Fire Brigade (LFB), nga ang sunog miulbo sa usa ka transformer nga adunay sulod nga 25,000 ka litro nga cooling fluid.
Tungod niini, kapin sa 65,000 ka panimalay sa maong dapit ang nawad-an og suplay sa kuryente ingon man ang airport.
Gilusad na ang imbestigasyon sa hinungdan sa sunog, nga nagtutok sa mga electrical distribution equipment.
