CEBU CITY-Giimbestigaran karon sa kapulisan kung duna bay nahitabong foul play sa pagkamatay sa usa ka helper human kini magaling sa cement mixer sa may Barangay Tapon lungsod sa Dumanjug, probinsya sa Cebu.
Sa pakighinabi sa Bombo Radyo Cebu kang Police Major Ardioleto Cabagnot, ang hepe sa Dumanjug PS, giingon niini nga basi sa imbestigasyon niadtong Huwebes, Hunyo 4 sa gabii, nanglimpyo matud pa sa cement mixer dool sa usa ka construction site ang biktima nga si Mariano Barrios, 49 anyos ug lumad nga taga Bais, Negros Oriental.
Wala matud pa nabantayan sa plant operator nga dunay tao hinungdan nga gi-paandar niini ang mixer hangtud sa sa nabati niini ang siyagit sa biktima nga nagpakitabang. Dali nga gipalong sa operator ang mixer sa dihang nakita niini nga nagaling na ang biktima ug hapit na masagol sa gimasang semento.
Dali kining gidala sa tambalanan apan nakabsan gyud sa iyang kinabuhi. Dugang pa ni Cabagnot nga milabay pa ang duha ka adlaw ayha kini na report sa ilang buhatan hinungdan nga nakig-alayon dayon sila Construction firm aron nga imbestigaran ang nahitabo.
Gihuwat usab karon sa kapulisan kung mag-request ba ang pamilya sa biktima og autopsy. Gi-abaga hinoon sa QM Builders kansang gitrabaho-an sa biktima ang gasto sa pagpatambal ug ang pagpalubong sa biktima.
Una na usab nga gihimug-atan sa operator nga aksidente lang ang nahitabo sa bitkima ug naghuwat kini kung aduna bay makatestigo sa maong panghitabo.| GN
