TOLEDO, CEBU-Kumbinsido ang kapolisan sa Toledo nga ilang nasikop ang tukmang tawo sa pagpatay sa 17-anyos nga batang babaye, kinsa napalgang patay ug hubo na sa kasagbutan sa Barangay Bunga, dakbayan sa Toledo niadtong Biyernes sa buntag, Agosto 25, 2023.
Sa pakighunabi sa Bombo-Radyo Cebu kang Police Lieutenant Colonel Manolo Salvatierra, hepe sa Toledo Police Station, gitumbok niini mao ang suspek nga si Jonathan Atan Sugabo, 29, residente sa maong barangay, kinsa nasikop niadtong Biyernes sa hapon, Agosto 25.
Iyang gitumbok ang suspek sa pagpatay sa 17-anyos nga si Sharmaine Flores.
Matod sa opisyal nga karong Martes, Agosto 29, pasakaan una nila og kasong pagpatay ang suspek tungod kay holiday man sa Lunes, Agosto 28.
Sa pikas bahin, kumbinsido usab ang inahan sa biktima, nga si Anna Maria Flores, nga si Sugabo ang giingong mipatay sa iyang anak.
