CEBU CITY – Itagana na ni Cebu City Mayor Edgardo Labella ang tanang hinabang ngadto sa mga elected barangay officials ug dili na ipaagi sa Mayor’s Information and Liaison Office (MILO).
Kini ang desisyon sa mayor human sa mga reklamo nga giingong nasagolan ug pamolitika.
Mipasabot si Mayor Labella nga gusto lang unta niini nga mag-uban ang mga kapitan, ingon man ang MILO gumikan kay sila man ang bugtong nasayod sa ilahang mga konstituwente ug magtinabangay lang arun nga madali ang paghatag sa mga hinabang, apan giangkon sa opisyal nga nasayop kini sa iyahang pagtuo gumikan kay nagpasulabi sa gihapon ang politika.
Giawhag ni Mayor Labella ang mga barangay officials ug MILO ipadaplin ang politika ug magtinabangay alang sa kaayohan sa tanan taliwa sa gisagubang nga krisis.
Sigon pa sa mayor nga ang budget alang sa mga barangay ang ihatag niini ngadto tanan sa mga barangay kapitan ug mando niini nga gamiton ang 80% sa budget sa pagpalit ug relief goods, samtang 20% ang pagpalit sa mga face mask, alcohol, hand sanitizer ug uban pa.
Mipahimangno usab kini sa mga barangay officials nga walay pili-on sa paghatag ug hinabang.
Nagkanayon si Labella nga ‘accountable’ ang tanang opisyal sa mga gigunitan nga pondo alang sa pagtabang sa mga nagkinahanglan niining panahon sa COVID-19 crisis.
