CEBU CITY-Nasikop sa Cebu City Police Office (CCPO) ang usa ka lalaki nga giilang si John Bryan Belamia Fernandez, 27, taga Barangay Suba, dakbayan sa Sugbo.
Nakurat ang kapulisan human nila masayran nga ang 35-anyos nga taga Sitio Lawis, Barangay Pasil, nitug-an nga tulo ka mga tawo ang iyang gipatay sa managlahing higayon bugti sa bayad.
Gitino ni CCPO Director Colonel Ireneo Dalogdog nga si Fernandez niangkon sa pagpusil patay kang Arnold Manluloyo Tahir, alyas Kirat, sa Sitio Bagong Silang Whiteroad, Barangay Inayawan niadtong Marso 19 human gikatahong giwaldas sa biktima ang kuwarta sa amo ni Fernandez.
Gipusil usab ni Fernandez si Anderson Talaba, alyas Kidlat, sa Sityo Abellana, Barangay Suba niadtong Abril 3 tungod kay gikatahong napakyas ang biktima sa pag-remit sa halin sa mga transaksyon sa ilegal nga drugas.
Ang iyang pinakaulahi nga biktima mao si Theresa Romeron Zuniega, alyas Isat, kinsa gipusil atubangan sa sementeryo sa Barangay Carreta niadtong Mayo 15 human gikatahong giwaldas ni Zuniega ang kuwarta.
