CEBU-Nadakpan ang giila nga hitman nga nalambigit sa pagpamusil sa area sa Waterfront police station ug sa dakbayan sa Talisay sa gilusad nga buy bust operation sa kapulisan.
Nasikop ang suspect nga si Phillip Justine Ruiz 19, nga taga Sitio Zapanta Villagonzalo 1, Barangay Tejero sa dakbayan sa Sugbo sa Biyernes sa Sitio Doña Pepang Barangay Tejero sa dakbayan sa Sugbo .
Nakuha sa kapulisan ang mga pakete sa gituohang shabu nga motimbang sa 20 gramos nga dunay standard drug price nga P136,000.
Nalakip si Ruiz sa listahan sa kapulisan nga High Value Individual sa pagpayuhot sa illegal nga drugas.
Gawas sa illegal nga drugas nakakuha usab ang kapulisan og usa ka .38 nga revolver nga loaded sa tulo ka bala ug usa ka hand grenade.
Matod ni Police Major Efren dela Cruz Diaz Jr ang hepe sa Waterfront police station nga si Ruiz nalambigit na sa mga kaso sa pagpamusil sa dakbayan sa Sugbo.
Siya ang suspect sa pagpamusil sa Sitio Zapanta, Barangay Tejero niadtong Hulyo 30, 2023 ug niadtong Septyembre 3, 2023 sa Sitio Silangan 1, Barangay Tinago.
Nakakuha usab silag impormasyon nga naabot sa dakbayan sa Talisay si Ruiz sa pagpamusil bugti sa suhol sa mosugo kaniya.
Una niini, ang inahan sa nadakpan nga si Rutchel Ruiz midangop sa Bombo Radyo tungod nga nawagtang ang iyahang anak ug gi-report kini nga missing.
Hinungdan nga gipahibalo kini nga nakit-an na ang iyahang anak, gikalipay kini sa inahan, bisan paman ug nasikop ang iyahang anak tungod kay pila na ka police station iyahang giduolan ug wala niya kini makita, rason nga nakapabalaka kini kaniya.
