MANILA – Nakamugna og eksena ang usa ka Grade 10 student atol sa moving up ceremony sa usa ka tunghaan sa kaulohan.
Sa dihang dawaton sa estudyanteng si Joyce Miranda ang iyang pagka-honor student award, iyang gibitbit sa ibabaw sa stage ang standee sa idolo niini nga si Chan sa Korean pop group nga iKON.
Tungod sa maong eksena, nakahimo kini og makabungog nga palakpakan ug makapagaw nga kantyaw gikan sa audience.
Matud ni Miranda nga gihimo niyang inspirasyon sa pagtuon ang iyang “oppa” nga si Chan.
Nahimo niyang kapartner si Chan sa tanang kalisud ug kalipay isip usa ka estudyante. Gani, suportado ang iyang ginikanan sa pagkahilig sa K-Pop.
Nasayran nga kumpleto si Miranda sa mga merchandise sa iyang idolo nga si Chan ingon man ang grupo nga iKON.
Misaad si Miranda nga maningkamot gihapon siya inig tikang niya sa senior high kauban ang idolo nga si “Oppa” Chan.
