Gibutyag ni Senador Risa Hontiveros nga andam siya nga modagan sa pagka-presidente sa 2028 nga eleksiyon, apan iya lang kining buhaton kon pilion siya sa nagkahiusang oposisyon isip standard bearer.
Sa forum sa Foreign Correspondents Association of the Philippines, si Hontiveros miingon nga ang desisyon nagdepende gihapon sa mga partido ug sektor sa oposisyon.
Matud niini, importante ang panaghiusa aron adunay kahigayonan nga modaog.
Gidugang usab ni Hontiveros nga nagsugod na sila sa pagpakigsulti sa lain-laing mga grupo, apan miinsistir nga kinahanglan adunay klaro nga gipaambit nga mga mithi ug dili lamang mga alyansa sa politika.
Kabahin sa posibilidad nga maapil sa kampo ni Presidente Ferdinand Marcos Jr. taliwala sa gipaabot nga pagdagan ni Bise Presidente Sara Duterte, si Hontiveros nagkanayon nga nagkinahanglan kini og makuting diskusyon tungod sa kalainan sa pagtuo.
Sa pagkakaron, matod niya, mas nakatutok siya sa trabaho sa Senado samtang daghan pa ang mahimong mahitabo sa mosunod nga duha ka tuig.
