MANDAUE CITY-“You can run sexy, or you can run scary”.// Kini ang konsepto nga namugna sa Kaabag Foundation inubanan sa Taga-Mandaue Inc. (TMI) sa ilahang ipahigayon nga “Horror Run” karung Oktubre 31 nga pagasugdan alas 9 sa gabii.
Gipahibalo ni Gwynn Christine Tianero, nga nahinabi live sa Bombo Radyo Cebu atol sa ‘Goodmorning Philippines Program’ lang secretary sa TMI, nga aduna sila’y fun run t-shirt nga mahimung sul-ubon sa mga runners o mahimu usab sila nga mag-costume.
Matud pa nga sa katapusan sa ‘race’, mamili sila ug mga mananaug isip ‘The Sexiest Victim‘ ug ‘The Scariest Villain’, ingun man ang Best in Makeup, ug ang Biggest Contingent. Gipasabut ni Tianero nga adunay mga grupo nga misalmot hinungdan nga lakip sa ilahang mahatagan ug premyo ang ‘Biggest Contingent‘ susama na lang sa usa ka baranggay nga nagpa-rehistro isip usa ka grupo.
Gawas pa niini, makadawat usab ug pa-premyo ang mga mudaug sa 3K, 4K, 5K, ingun man sa 10K run.Dugang pa niini, giingung human sa fun run adunay Halloween Party nga ipahigayon kung diin mahimung maki-party ang tanang misalmot sa Horror Run.
Nagkanayon si Tianero nga ang maong kalihukan usa ka fund raising activity alang sa mga beneficiaries sa Kaabag Foundation ug TMI. (SBR)
