Nagpadayon ang hot pursuit operation sa mga personahe sa Philippine Drug Enforcement Agency Regional Office 9 batok sa pito ka mga tawo nga persons deprived of liberty nga nakaikyas sa ilang mga prisohan sa Zamboanga City.
Basi sa inisyal nga report, nadiskubrehan sa mga prison guard ang prison break sa maong mga piniriso ug ila dayong gipahibalo sa ilang mga kaubang duty officer.
Sa imbestigasyon nga gihimo sa mga otoridad, nasayran nga nakaikyas ang maong mga suspek pinaagi sa paghimo og gamay nga buslot sa bahin sa kisame sa ilang bartolina.
Gumikan niini, nag-umol ang mga awtoridad og tracker team nga gilangkuban sa hiniusang puwersa sa PDEA Regional Office 9 ug Zamboanga City Police Office alang sa dinaliang pagsikop sa mga nakaikyas nga mga piniriso.
Giila sa mga awtoridad ang nakaikyas nga mga piniriso nga sila Wilson Indanan Sahiban, Junjimar Hajili Aiyob, Jimmy Angeles Sahibol, Kerwin Mohammad Abdilla, Albadir Mala Ajijul, Muhajiran Romeo Jumlah, ug si Amil Khan Mahadali Abubasar.
Nasayran niadtong Mayo 3, 2024, dungan nga nasikop ang maong mga suspek sa buy-bust operation sa mga operatiba sa Barangay Mampang, Zamboanga City diin 21.4kg nga shabu, gibanabanang nagkantidad og P145.5 milyones.
