Gipalig-on pa sa House prosecution panel ang legal team niini human gipaila ang ikaduhang batch sa mga private prosecutor nga motabang sa umaabot nga impeachment trial sa Senado kang Bise Presidente Sara Duterte.
Diin ang bag-ong mga private prosecutor naglakip nila ni:
- Atty. Theodore Te
- Atty. Reynaldo Robles
- Atty. Arnold Labay
- Atty. Mae Divinagracia
Sumala sa House prosecution, ang upat adunay halapad nga kasinatian sa constitutional law, criminal ug civil litigation, election law, corporate law, human rights, ug legal education. Mouban kanila si Atty. Benjamin Tolosa ug ang unang grupo sa napulo ka private prosecutor sa pagpresentar og ebidensya batok sa bise presidente.
Atubangon ni VP Duterte ang mga alegasyon sa giingong sayop nga paggamit sa P612.5 milyon nga confidential funds, mga bakak nga deklarasyon sa iyang SALN, wala mapasabot nga bahandi, ug mga hulga batok kang Presidente Ferdinand Marcos Jr., First Lady Liza Araneta-Marcos, ug kanhi House Speaker Martin Romualdez.
