Gitudlo sa House prosecution team ang giingong sumbanan o pattern sa paggamit ni Bise Presidente Sara Duterte sa confidential funds, gikan sa iyang pagka-mayor sa Davao City hangtod sa iyang pagdumala sa Office of the Vice President ug sa Department of Education.
Sumala ni House prosecutor Joel Chua, ang confidential funds sa Davao City mitubo pag-ayo atol sa panahon ni Duterte isip mayor, nga miabot og kapin sa P2.6 bilyon gikan sa 2016 hangtod 2022.
Ang tigpamaba sa House trial nga si Zia Alonto Adiong miingon nga ang importanteng pangutana karon mao nganong ang confidential funds daw nahimong importante kang Duterte.
Sa OVP, P500 milyon ang confidential funds sa 2022 hangtod 2023, samtang P112.5 milyon ang gi-allocate sa DepEd sa 2023.
Gipasiugda usab sa prosekusyon ang kalambigitan sa pipila ka mga personahe nga kaniadto nagdumala sa confidential funds ni Duterte sa Davao City, lakip ang kanhi OVP special disbursing officer nga si Gina Acosta.
