CENTRAL VISAYAS-Positibo ang mga nadawat nga taho sa buhatan sa Highway Patrol Group Central Visayas (HPG-7) human nga ilang gipahugtan ang ilang presensya sa Trans Central Highway nunot sa mga sunod-sunog nga disgrasya sa mga motorista.
Mao kini ang gipaambit ni Pol. Lt. Col. Wilbert Parilla, ang hepe sa HPG-7 atol sa pakighinabi sa Bombo Radyo Cebu diin nag-anam-anam na og kaminus ug kamingaw ang maong dapit diin kasagarang tambayan sa mga motorista arun mag bangking-bangking ug uban pa.
Gani, ubay-ubay na ang mga nadakpan nga mga motoristang mikatkat sa TCH nga walay lisensya, nakalapas sa Presidential Decree No. 96 o illegal nga pagbutang og serbato o blinkers.
Gisaysay ni Parilla nga kanunay na sila maghimo og operasyon sa TCH, ingon man ubang dapit arun wala na’y magbangking-bangking hilabi nga misaka ang ihap sa mng nangamatay ug naangol.
Sa pikas bahin, mihatag na usab ang buhatan sa HPG 7 sa ilang koordinasyon ngadto sa LTO alang sa pag-abag sa seguridad sa kadalanan sa umaabot nga kalag-kalag 2024.
Ingon man nga aduna nay mga nakalinya nga kalihokan ang buhatan sa umaabot nga isaulog arun sa pagmintinar sa mga highway ug pagsiguro nga mosunod ang mga motorista sa lagda sa trapiko.
