Patay ang usa ka pulis human madasmagi sa usa ka bus nga kalit mi-counterflow sa kadalanan sa Barangay Inuburan, Naga City pasado alas 7:45 sa buntag niadtong Dominggo, Pebrero 1, 2026.
Giila ang biktima nga si Police Executive Master Sergeant Antonio Sando, 55-anyos, miyembro sa Traffic Police Group ug residente sa Carcar City.
Base sa imbestigasyon sa Naga City Police Station nagpakita nga ang mga sakyanan nagbiyahe sa managlahing direksyon, diin ang bus nga may plakang GXV 290, nga gimaneho ni Junrel Villamor Cavalida, 43, residente sa Bato, Samboan, padulong sa Naga City gikan sa San Fernando, samtang si PMSg Sando padulong sa San Fernando gikan sa Naga City.
Gikatahong usa ka pribadong auto nga padulong sa dakbayan sa Sugbo ang kalit nga mihunong sa inner lane sa dalan hinungdan nga kalit nga ni-brake ang mga sakyanan sa luyo niini nga miresulta sa pagkabangga sa laing pribadong auto lakip ang duha ka managlahing motorsiklo.
Sa pikas bahin, aron nga makalikay ang bus sa mga nagbundol nga sakyanan miliko kini hiungdan nga nalapas kini sa pikas lane nga miresulta sa pagkadasmag sa motorsiklo nga gisakyan ni PMES. Sando.
Nakaangkon og grabeng mga samad ang biktima hinungdan nga dali kining gidala sa tambalanan apan gideklarar kining dead on arrival.
Samtang, anaa na karon sa kustodiya sa Naga City Police Station ang drayber sa bus ug mag-atubang og kasong Reckless Imprudence Resulting in Homicide and Damage to Property.
