Gikanselar ni US President Donald Trump ang hulga nga atakehon ang mga planta sa kuryente sa Iran human sa iyang giingon nga mabungahon nga mga panagsulti tali sa duha ka nasud, usa ka pahayag nga kusganong gihimakak sa Tehran.
Sumala ni Trump, ang US ug Iran nagpahigayon og mga negosasyon alang sa kompleto ug hingpit nga resolusyon sa mga panag-away sa Middle East.
Tungod niini, wala niya gituman ang miaging 48-oras nga deadline nga gihatag niadtong Sabado diin siya nagpasidaan sa pagguba sa mga pasilidad sa Iran kung ang Strait of Hormuz dili maablihan pag-usab.
Nunot usab sa pahibalo diha-diha dayon nagpaus-os ang presyo sa lana ug gas sa merkado sa kalibutan.
Sa sayo pa, si Trump ug ang Punong Ministro sa UK nga si Keir Starmer nakigsulti usab, diin ilang giinsistir nga ang pag-abli sa nahisgutang strait importante alang sa pagbalik sa normal nga global shipping.
Bisan pa sa mga pahayag ni Trump, usa ka wala nganli nga tinubdan gikan sa usa ka ahensya sa balita sa Iran ang nagpasiugda nga walay direktang panagsulti nga nahitabo tali ni Trump ug Tehran.
