CEBU CITY — Nabuhi ang rehimeng Marcos sa kasamtangang administrasyon ni Presidente Rodrigo Duterte.
Maisogon nga gipadayag ni Atty. Democrito Barcenas, human rights lawyer nga sa panahon ni Duterte giingong tuyo nga wagtangon ang dungog isip bayani sa kanhi senador Ninoy Aquino.
Matud pa nga ang anak sa presidente nga si Davao City 1st District Representative Paolo ‘Polong’ Duterte ang nagduso sa balaudnon nga pagtangtang sa ngalan ni Ninoy sa nasudnon nga tugpahanan sa Pilipinas o ang Ninoy Aquino International Airport (NAIA).
Dugang pa niini nga sukwahi usab ang desisyon ni Presidente Duterte kung diin gipalubong ang kanhi presidente Ferdinand Marcos sa ‘Libingan ng mga Bayani’.
Gibutyag ni Barcenas nga susamang adunay nahitabo nga ‘undeclared martial law’ sa administrasyong Duterte apan daghan lang sa mga Pilipino ang nalingla ug padayon nga nagsangyaw sa kasamtangang presidente.
Mipahinumdom si Atty Barcenas sa mga Pilipino nga angayan nga hatagan ug importansya ang demokrasya nga gitagamtam sa kasamtangan, ug dili tugotan ang bisan si kinsa man nga presidente nga subling mamahimong diktador. /SBR
