Hurricane Milton, anaa na sa Category 5 ug misubay na sa giagian sa Hurricane Helene sa Florida

FLORIDA, US STATE- Mas nikusog pa ang Hurricane Milton ug nahimong Category 5.

Matod sa National Hurricane Center, nakasustenir kini og hangin nga moabot sa 160 milya matag oras.

Sukad niadtong Domingo paspas kining misugod sa 70 mph ug sulod sa 24 oras ang kusog niini anaa sa 160 mph.

Kini ang ikaduhang Category 5 nga bagyo, ang una mao ang Hurricane Beryl nga miguba sa Caribbean Sea niadtong Hulyo.

Ang Hurricane Milton nagpaingon na sa Florida, nga unang naigo sa bagyong Helene.

Diin ang mga lumulupyo sa Tampa, Florida nanglimbasog sa pagtangtang sa mga debris gikan sa Hurricane Helene sa wala pa ang pag-abot sa Hurricane Milton.

Daghang mga lugar sa Florida ang nagpatuman na og mga evacuation isip pagpangandam sa pag-abot sa Hurricane Milton.