Wala makauyon si Ian de Leon sa mga nanggawas nga pamahayag sa iyang igsoon nga si Lotlot de Leon kalabot sa giingong dili pagsinabtanay sulod sa ilang pamilya bahin sa kabtangan ug pagpreserba sa handumanan sa ilang namatay nga inahan ang Superstar ug National Artist nga si Nora Aunor.
Pinaagi sa sunod-sunod nga Facebook stories, direktang gitubag ni Ian ang mga alegasyon nga gipaambit ni Lotlot atol sa story conference.
Una nang gipatin-aw ni Lotlot nga dili panulondon o kabilin ang hinungdan sa ilang panagbangi.
Giingon usab ni Lotlot nga naghimo og dili tinuod nga mga estorya si Ian ug wala kini nagpahibalo sa ilang mga igsoon nga sila si Matet, Kenneth, ug Kiko bahin sa pagtukod og usa ka One-Person Corporation (OPC) alang sa pagdumala sa mga kabilin ni Nora Aunor.
Depensa ni Ian, dili siya supak sa pagtukod og pundasyon alang sa ilang inahan, apan gusto niya nga hapsay ug kompleto una ang tanang legal nga dokumento sa dili pa kini sugdan.
Matud pa niya, dugay na niyang gipahibalo sa pamilya nga adunay saktong proseso ug “time frame” nga kinahanglang sundon sa paghusay sa estate sa ilang inahan.
Gipasabot ni Ian nga abli siya sa pagtukod og pundasyon, apan kinahanglan una nga maasikaso ang mga legal nga dokumento aron masiguro ang patas ug hapsay nga pagbahin sa kabilin ngadto sa tanang mag-igsoon.
