CEBU CITY – Dismayado si RTC 7 Executive Judge Macaundas Hadjirasul sa nahitabung pag-ambush kang Atty. Inocencio Dela Cerna gawas mismo sa Cebu City Hall of Justice.
Gibutyag ni Judge Hadjirasul nga mao na kini ang ikaupat nga insidente kung diin ang mga biktima gikan sa Hall of Justice hinungdan nga gikasagmuyu niini ang maong panghitabu.
Gihimug-atan sa huwes nga mas maayu na lang nga ipasiradu ang Hall of Justice kung pamatyun na lang ang mga nagagikan sa nahisgutang korte.
Matud pa nga daku nga kaulawan dili lang sa nasud inay sa syudad sa Sugbo kung diin ang lugar nga daganan sa tawu arun nga makakuha ug hustisya gihimu naman ug patyanan.
Nakadugang sa pagkadismaya ni Hadjirasul mao ang CCTV camera nga nag-atubang gayud sa crime scene ang wala nag-function.
Subay niini, nanawagan si Judge Hadjirasul sa kadagkuan sa PRO 7 ug Cebu City Police Office nga butangan ug dugang police visibility sa Hall of Justice alang sa mas hugut nga seguridad.
Samtang, gikundinar usab sa IBP-Cebu Chapter ang nahisgutang insidente kung diin giingung nagdugang lang kini sa mga wala pa masulbad nga kaso sa pagpatay sa mga manlalaban.
Sa gipagawas nga pamahayag sa IBP, giingung ang pag-ambush kang Atty Dela Cerna ang dili lang pagpangataki sa usa ka ‘officer in court’, inay usa usab kini ka pagpangataki sa ‘rule of law’, ingun man sa mga Sugbuanon.
Apan sa gihapun, isip mga manlalaban, gipadayag sa IBP-Cebu Chapter nga magpadayun ang ilahang trabaho isip tigpanalipud sa balaud ug hustisya sa sosyidad.
