Gisalikway sa Pre-Trial Chamber I sa International Criminal Court (ICC) ang apela sa defense team ni kanhi Presidente Rodrigo Duterte nga balihon ang desisyon nga nagdeklarar kaniya nga “fit” o makahimo sa pag-apil sa mga proseso sa pre-trial court proceedings.
Sa desisyon nga gi-isyu niadtong Biyernes, Pebrero 13, ang chamber miingon nga ang argumento sa depensa, nga ang panglawas sa kanhi Presidente mahimong nagkagrabe atol sa husay nga usa ka espekulasyon ug pangagpas lamang.
Giklaro usab sa ICC nga ang miaging desisyon niini niadtong Enero 26, 2026 bahin sa iyang kahimsog sa pag-atubang sa husay dili usa ka katapusang paghukom sa iyang kahimsog sa pag-atubang sa husay.
Nangatarungan kaniadto ang kampo ni Duterte nga ang proseso dili patas ug nga ang “objective facts” sa daw pagkadaot sa memorya sa kanhi Presidente nga daw wala tagda.
Nagpasidaan usab ang depensa nga ang tibuok proseso mahimong maapektuhan kung ang pagdungog sa kumpirmasyon sa mga kaso magpadayon samtang wala hingpit nga gigamit ni Duterte ang iyang mga katungod.
Samtang, human sa desisyon sa ICC sa petisyon sa kampo ni Duterte, nakita nga kini ang mag-abli sa dalan para sa pagpadayon sa kaso ug ang gikatakdang pagdungog sa kumpirmasyon sa mga kaso nga ipadayon sugod sa Pebrero 23.
