Gibalibaran sa International Criminal Court o ICC ang hangyo sa kampo ni kanhi President Rodrigo Duterte nga himuong mandatory ang paglakip og “expert verification reports” alang sa mga ebidensya gikan sa open-source ug user-generated materials nga gisumite ngadto sa tribunal.
Ang defense team mihangyo nga usbon ang E-Court Protocol sa ICC aron dugangan og rekisitos nga “expert verification” ang usa ka piho nga metadata field sulod sa electronic discovery system sa Court Registry.
Sa usa ka desisyon nga gipetsahan og Setyembre 28, gipahayag sa Trial Chamber III nga ang maong rekisitos mahimong hinungdan sa dili kinahanglanong pagkalangan sa pagsugod sa husay tungod sa kadaghan sa mga ebidensya nga kinahanglang susihon.
Sumala sa Chamber, mahimong makab-ot sa depensa ang ilang tumong pinaagi sa kasamtangang mga proseso nga nagtugot sa mga partido sa pagkuwestiyon sa admissibility o uban pang mga sumbanan sa ebidensya, bisan sa panahon sa pagsumite niini o diha-diha dayon human maila ang usa ka isyu.
Ang husay sa kaso ni Duterte sa ICC gikatakdang magsugod sa Nobyembre 30.
