Gipasalig sa International Criminal Court nga ang ilang pagbista kang kanhi Presidente Rodrigo Duterte mahimong patas, walay gidapigan, ug independente.
Sumala sa tigpamaba sa ICC nga si Oriane Maillet, gihatagan nila ang defense team sa kanhi presidente og igong panahon alang sa umaabot nga hearing sa kaso nga may kalabotan sa mga krimen batok sa katawhan.
Gipasabot usab niya nga ang mga pagdungog sa ICC kasagaran mas halapad ug mas taas kumpara sa mga kaso sa lebel sa nasud. Kini tungod kay ang maong klase sa krimen nagkinahanglan og daghang ebidensya nga ipresentar sa korte, ug nagdala usab og dagkong hagit sa proseso sa paglitigasyon.
Kahinumduman nga niadtong Abril 23, gikumpirma sa ICC Pre-Trial Chamber ang mga kaso nga krimen batok sa katawhan batok kang Duterte.
Ang status conference ipahigayon sa Mayo 27 sa Trial Chamber III. Giingon usab nga ibilin sa mga trial judges ang pagtakda sa eksaktong iskedyul sa pagbukas sa hearing, base sa mga gisumite sa tanang partido sa kaso.
Kini nga hearing ipahibalo sa publiko ug mahimong tan-awon pinaagi sa live online broadcast.
