Nagmando ang International Criminal Court (ICC) og bag-ong medical examination kang kanhi presidente Rodrigo Duterte aron masayran kung angayan pa ba siyang moatubang sa pagdungog sa kasong crimes against humanity niini.
Atol sa unang status conference nga gipahigayon, si ICC Trial Chamber III Judge Joanna Korner miingon nga ang mga eksperto mosusi pag-usab sa kondisyon ni Duterte human ang iyang kampo nagsang-at og mosyon.
Sumala sa depensa, ang miaging medical assessment alang lamang sa pagkumpirma sa mga kaso ug dili alang sa trial mismo.
Dugang ni Korner nga ang korte mahimong momando dayon og bag-ong eksaminasyon aron makakuha og updated nga report sa panglawas sa kanhi presidente.
Tungod niini, gi-postpone sa ICC ang pagtakda sa eksaktong petsa sa pagsugod sa pagdungog.
Sumala ni Korner, importante nga mahibal-an una ang tinuod nga kondisyon ni Duterte, labi na kay kini may kalabutan sa iyang edad ug posibleng mga problema sa panglawas.
Gihisgutan usab sa status conference ang lain-laing mga isyu nga may kalabutan sa kaso, sama sa mga deadline sa wala pa ang husay, pagsumite sa ebidensya, mga pinulongan nga gamiton sa husay, ug mga obligasyon sa pagbutyag sa duha ka partido.
Gikuwestiyon usab niini ang plano sa prosekusyon nga magpresentar og 197 ka mga pakigpulong isip ebidensya sa kaso batok kang kanhi Presidente Duterte, nga nag-ingon nga ang gidaghanon daw “sobra ra” kung ang mga pakigpulong adunay parehas nga mga pahayag, samtang ang mga prosecutor miingon nga ang lista mahimong maminusan pa samtang nagpadayon ang mga pagpangandam sa husay.
