Nagtakda na og pormal nga iskedyul ang International Criminal Court (ICC) alang sa ikaduhang status conference sa kaso nga giatubang ni kanhi Presidente Rodrigo Duterte, nga may kalabotan sa giingong crimes against humanity (krimen batok sa katawhan) tungod sa iyang madugoon nga “gubat batok sa droga.”
Sa usa ka publikong mando nga gi-isyu sa ICC niadtong Huwebes, gipahibalo nga ang maong status conference ipahigayon karong Hunyo 23, 2026, gikan sa alas-10:00 sa buntag hangtod sa alas-12:00 sa udto (lokal nga oras sa The Hague).
Sumala sa Trial Chamber III sa ICC, lima ka pangunang isyu ang mamahimong sentro sa diskusyon sa maong hearing, lakip ang mosunod:
-Pagtakda sa deadline sa pagsumite sa mga obserbasyon alang sa Expert Panel Report;
-Pagsagop sa usa ka protocol alang sa pagdumala sa mga kompidensyal nga impormasyon;
-Paglimita sa gitas-on sa Prosecution Trial Brief;
-Pag-iskedyul sa mga sunod nga status conference human sa judicial recess; ug
-Mga pahayag sa publiko nga gihimo sa mga abogado.
Ang unang status conference gipahigayon niadtong Mayo 27, 2026, diin nakahukom ang korte nga gikinahanglan ang ikaduhang sesyon alang sa mas detalyado nga diskusyon sa dagan sa kaso.
Agig pagpangandam, nihangyo ang korte niadtong Hunyo 12 nga isumite ang mga sugyot alang sa diskusyon.
Sumala sa rekord, ang prosekusyon lamang ang nagsumite og rekomendasyon niadtong Hunyo 17, samtang ang depensa ug ang Registry mipahibalo nga wala silay dugang nga isumite.
Bisan kung bukas sa publiko ang status conference, giklaro sa ICC nga mahimo silang magpahigayon og pribadong sesyon (in-camera) kung gikinahanglan, ilabi na aron malikayan ang paggawas sa mga sensitibong impormasyon nga may kalabotan sa proteksyon ug seguridad sa mga saksi.
Gikumpirma usab sa korte nga dili motambong si Duterte sa maong hearing human niya gi-waive o gibalewala ang iyang katungod sa pagtambong.
