Nitudlo ang International Criminal Court (ICC) Pre-Trial Chamber 1 og mga medical expert aron sutaon ang kahimtang sa panglawas ni kanhi Presidente Rodrigo Duterte sa pag-apil sa hearing nga giatubang kalabot sa giingong crimes against humanities.
Base sa usa ka dokumento nga pinetsahan og Oktubre 9, ang ICC mimando sa pagtudlo sa usa ka multidisciplinary panel nga gilangkoban sa mga eksperto sa forensic psychiatry, neuropsychology, ug behavioral neurology aron sa pagtino kon ang kanhi Presidente adunay medikal nga kondisyon nga makaapekto sa iyang pagsabot ug pag-apil sa proseso sa trial.
Ang katuyoan sa eksaminasyon mao ang pagtino kung nasabtan ba sa kanhi Presidente ang katuyoan ug sangputanan sa kaso, ang ebidensya batok kaniya, ug kung makahimo ba siya paghatag usa ka pahayag o makigsulti sa iyang abogado alang sa iyang depensa.
Matod sa lead counsel ni Duterte nga si Atty. Nicholas Kaufman, ang kanhi presidente gikataho nga nakasinati og mga kakulangan sa panghunahuna ug naglisud sa paghinumdom sa mga panghitabo, mga lugar, ug bisan sa pipila ka mga sakop sa iyang pamilya ug legal nga grupo.
Gumikan niini, nihangyo ang kampo ni Duterte og “indefinite adjournment” o temporaryong pagsuspenso sa kaso, apan gibalibaran kini sa ICC tungod sa kahadlok nga basin og makalikay si Duterte sa husay tungod sa iyang mga hulga kaniadto sa mga testigo ug sa padayong impluwensya sa iyang pamilya dinhi sa nasud.
