Nag-file ang prosecution panel sa International Criminal Court (ICC) og ikaduhang updated nga listahan sa ebidensya batok kang kanhi Presidente Rodrigo Duterte, sumala sa gimando sa Pre-Trial Chamber niadtong Pebrero 10, 2025.
Sumala sa notipikasyon sa ICC, duha ka bag-ong butang ang nadugang batok kang Duterte, apan ang annex nagpabilin nga kompidensyal tungod kay kini adunay sensitibo nga impormasyon sa saksi.
Ang update miabot pipila ka adlaw human gitugotan sa Pre-Trial Chamber ang prosekusyon ug depensa nga magpresentar og bag-ong ebidensya.
Mahinumduman nga si Duterte gidakop niadtong Marso 11, 2025, sa iyang pag-abot gikan sa Hong Kong, isip kabahin sa imbestigasyon sa ICC sa iyang gitawag nga “war on drugs.”
Sumala sa warrant sa ICC, si Duterte giingong nagmugna, nagpondo, ug nag-armas sa mga death squad nga nalambigit sa pagpatay sa mga gidudahang tiggamit ug tigbaligya og droga.
Gidala siya sa The Hague sa samang adlaw ug mitungha sa korte pinaagi sa video link niadtong Marso 14.
Niining bahina, balik-balik usab nga gisalikway sa Pre-Trial Chamber ang hangyo sa depensa sa kanhi presidente alang sa iyang interim release.
Ang Pre-Trial Chamber nagtakda og kumpirmasyon sa mga kaso nga ipasaka batok kang Duterte gikan sa Pebrero 23 hangtod 27, 2026 sa The Hague. Kini ang modesisyon kung adunay igo nga ebidensya aron hingpit nga ipadayon ang kaso batok kaniya.
Ang lakang kabahin sa nagpadayon nga imbestigasyon sa ICC sa mga alegasyon sa paglapas sa tawhanong katungod atol sa paglingkod ni Duterte isip kanhi Mayor ug Presidente sa Pilipinas.
