CEBU CITY-Nagpaabot sa iyang pagpasalamat ang igsoon ni Cebu Archbishop Emeritus Ricardo Cardinal Vidal nga si Juanito Vidal sa mga Cebuano tungod sa gipakita niini nga paghinumdom sa iyang igsoon.
Si Juanito ang manghud ni Cardinal Vidal ug ang bugtong buhi nalang sa 5 nila ka magsoon.
Sa pakighinabi sa Bombo Radyo Cebu kang Juanito nagbakho kini samtang nagkanayon nga sakit para kaniya ang pagkamatay sa iyang igsoon apan wala na siyay mahimo kay pagboot man kini sa Ginoo. Matud niini nga gi-tanyag naman usab sa Cardinal ang iyang kinabuhi sa Diyos ug pagserbisyo sa mga tao pinaagi sa pulong sa Ginoo.
Gani, giingon pa ni Juanito nga kung muuli si Cardinal Vidal sa ilang probinsya sa Marinduque, giingong magdali dayon kini og balik sa Cebu. Gihulagway usab ni Juanito nga niadtong mga bata pa sila, mapahi-ubsanon na gyud ang Cardinal ug dili kini magdumot.
Dugang pa niini gihandum usab niya ang katapusang mga adlaw nga nagkaistorya pa sila iyang igsoon kung diin nakinataw-anay pa sila tungod kay natagaan pa sila og taas nga kinabuhi ug nagkauban pa.
Nasayran nga niadtong buhi pa ang ang Cardinal, gihangyo niini nga kung asa siya madestino , adto ra usab siya ilubong ug dili na i-uli pa sa sa Marinduque butang nga wala usab gisupak ni Juanito.
Gihaya ang cardinal sa Cebu Metropolitan Cathedral ug abli kini karon sa mga publiko 24 ka oras. Hinoon wala pay nakatakda nga petsa kung kanus-a kini mahatud sa iyang katapusang pahuwayanan.
