CEBU CITY-Gipresentar karong adlawa sa Labangon Police Station ang mga ebidensya nga nagtumbok ni Simeon Gabutero nga maoy suspek sa pagpatay ni Reah Mae Tocmo.
Una na niini ang tipik sa extra judicial confession ni Gabutero, kung diin gi-angkon niya nga sa iyang gi-abangang kwarto napatay si Rhea Mae Tocmo sa nilabay nga Hulyo 16, 2023.
Gani, nakuha sa crime scene sa kapulisan ang kabahin sa interior nga maoy posibleng interior pud nga gigamit sad sa paghigot sa lawas ni Tocmo human gisulod sa karton.
Gibutyag usab sa kadagkuan sa Labangon Police Station pinaagi sa pango sa hepe niini nga si Police Major Angelito Valleser nga ang kauban ni Gabutero sa pag-dispatsar sa lawas ni Tocmo mao ang igsoon niini, basi sa CCTV footages kung diin nakit-an si Gabutero nga angkas ang usa ka menor de edad nga maoy misabak sa naasoy nga karton.
Matod pa ni Valleser nga kasamtangan nga gihuptan sa kustodiya sa kapulisan ang menor de edad nga igsoon ni Gabutero ug gipugngan lang una ang pangalan niini sanglit menor de edad pa kini.
Dugang pa, nga bisan wala ma klaro ang plate number sa motor apan ang kolor sa motor nga yellow ug ang gisul-ob ni Gabutero ug igsoon niini klaro sa tanang CCTV footages nga nakuha sa kapulisan gikan sa Barangay Guadalupe padung sa Barangay Tisa sa dakbayan sa Sugbo.
Nasayran sab nga namakak si Gabutero sa iyahang inahan ug mipasangil nga naa siyay ihatod uban ang iyahang manghud gabie sa Hulyo 16, apan ang maong lakaw kay aron i-dispose ang patay nga lawas ni Tocmo.
Samtang, nagsumangil sad si Gabutero sa iyang mama nga sinina ang sulod sa maong karton.
Gawas sa mga CCTV camera, daghan pang mga ebidensya ang gipakita ni Valleser nga nagpamatuod nga si ‘Gabro’ lang ang nihimo sa krimen gawas sa pagpangayo niini og tabang sa iyang manghud pagkarga sa patay’ng lawas ni Rhea Mae.
Sa laing bahin, gipadayag ni Valleser nga ang pagsulbad sa maong kaso kay gumikan sa hiniusang pwersa sa kapulisan sa Dakbayan sa pagpango sa City director nga si Police Colonel Ireneo Dalogdog.
