CEBU CITY- Padayon ang paglaum sa pamilya sa missing nga Bol-anong seaman nga si Gilbert Salomon taliwala sa nagpadayon nga search and rescue operation human masunog ang M/V June Aster sa kadagatan sa Coron, Palawan.
Sa eksklusibong pakighinabi sa Bombo News Team, gipahayag sa iyang igsoon nga si Lydemarie Salomon-Carlon nga nagtuo silang buhi pa ang ilang manghod nga lumad gikan sa Cabilao, lungsod sa Loon, Bohol tungod sa iyang pagkaaktibo, pagkamadiskarte, ug taas nga kasinatian sa pagtrabaho sa dagat.
Matod ni Lydemarie, nailhan si Gilbert o “Indo” sa ilang pamilya nga buotan, aktibo ug duol sa ilang mga ginikanan, ilabina sa ilang inahan.
Gpaambit niini nga gipili usab ni Gilbert nga magtrabaho sa Pilipinas imbes nga mo-abroad aron makatabang ug mahimong duol sa ilang mga ginikanan.
Sumala pa sa iyang igsoon, lisod para sa ilang pamilya ang matag adlaw nga walay klarong impormasyon bahin sa kahimtang ni Gilbert.
Apan ilang gikuptan ang paglaum nga nakalahutay siya sa insidente ug posibleng nakadangat sa laing bahin sa dagat o sa usa sa mga isla nga duol sa lugar diin nahitabo ang sunog.
Gihangyo sa pamilya ang search and rescue team ug ang crewing company nga palapdan pa ang pagpangita sa mga silingang isla sa Palawan, tungod kay dako ang ilang pagtuo nga nakalangoy ug nakadangat kini sa baybayon atol sa insidente.
Samtang, gipadayag usab ni Lydemarie ang ilang pagkadismaya tungod kay wala pa nila personal nga nahinabi ang kapitan sa barko sukad sa nahitabong sunog.
Nanawagan ang pamilya sa kompanya ug sa kapitan alang sa direktang komunikasyon, dugang nga suporta, ug regular nga updates samtang nagpadayon ang pagpangita ug ang pagproseso sa posibleng DNA identification.
