CEBU CITY-Proud ug malipayon ang igsoon sa Cebuano Gymnast Coach ni Olympian Gold Medalist Carlos Yulo nga si Allen Aldrin Castañeda nga lumad taga Barangay Hipodromo ning dakbayan sa Sugbo.
Sa eksklusibong pakighinabi sa Bombo Newsteam kang Allen Miles Castañeda, ang manghud ni Coach Aldrin diin gibutyag niini nga ang ilang pamilya kay hanas na daan sa gymnastics kay mismo iyang maguwang naapil na Philippine Team niadtong mga nakalabay nga dekada.
Dugang pa nga sa pito nilang manag-igsuon, sila tanan gymnast mahitungod sa kaagi sa ilahang inahan nga kinsa gymnast pud sa iyang panahon ug nahimo pa kining judge sa national games sa gymnastics.
Samtang, ang kagamhanang local sa dakbayan sa Sugbo, mupahigayon og Heroes Welcome kang Coach Aldrin ig human niini sa kampaya ni Yulo sa Paris Olympics 2024 kini gumikan sa pasidungog nga gihatag niya sa mga Sugbuanon.
Gawas sa Cebu City Government, nangandam usab ang Barangay Hipodromo sa pagsugat niini sa ilang ka-barangay pinaagi sa pagbuhat og tarpaulin nga maong idayan-dayan isip paghangop sa kalampusan ni Coach Aldrin.
