CEBU CITY — Nagbangutan ang igsuon sa mayor sa Clarin, Misamis Occidental nga si David Navarro ug nagpangutana kung aduna pa bay makuha nga hustisya subay sa kamatayon niini.
Matud sa manghud sa mayor nga si Princess Navarro-Madarang nga usa ka maayung tawo ug provider si David Navarro.
Emosyonal nga gibutyag ni Princess nga dili makakaon ug di maka-swela iyang mga anak tungod sa gidangatan sa iyang maguwang.
Nasayran gikan sa igsuon nga naabot ang mayor sa dakbayan sa Sugbo kay aduna kini gitambongan nga event kabahin sa pagpanerbisyo.
Sa gihapon, hustisya ang gipangayo ni Princess sa kamatayon sa iyang maguwang human masaksihan kung giunsa pagpatay ang mayor sa iyang atubangan.
Human sa duguong panghitabo dali niyang giduol ug gigakos ang patayng lawas ni Mayor Navarro.
Samtang hugot nga seguridad ang gipatuman sa Cebu City Police Office (CCPO) sa pribadong tambalanan kung diin gidala ang tulo ka mga aid ni Mayor David Navarro, ingon man ang hepe sa Clarin PNP human naangol sa nahitabong ambush kagahapon.
Anaa ang SWAT team, sakop sa kapulisan sa Abellana Police Station ingon man ang Guadalupe Police Station alang sa pagsiguro sa kaluwasan sa mga naangol.
Nasayran nga naabot ang hepe sa Clarin sa dakbayan sa Sugbo human, matod pa, giingon nga kaliwat ra usab kini sa asawa sa mayor.
Samtang adunay pagaumolon nga Special Investigation Task Group (SITG) ang kapulisan may labot na sa nahitabong pagpamanhig ubos sa kamanduan ni Police Lt. General Archie Gamboa ang OIC sa PNP.
Nasayran usab nga narekober sa SOCO team ang 39 ka mga basiyo sa M-16 rifle ug 28 ka mga kabhang sa kalibre 45 nga armas. (with reports by Bombo Eric Amaro/lq/gn)
