Nisaka ngadto sa 8.6 milyones ang gidaghanon sa mga babayeng Pilipino nga naggamit og contraceptives, diin ang birth control pills maoy labing popular nga paagi, sumala sa Commission on Population and Development (CPD).
Gipakita sa bag-ong datos nga ang gidaghanon sa mga babaye nga naggamit og mga contraceptives kay misaka gikan sa 8.3 milyon kaniadtong 2022.
Matud sa CPD, ang pagtaas sa paggamit sa contraceptives kay nagpakita nga mas ubos ang ihap sa mga gipanganak nga anak sa kababayen-an nga aduna ra’y 1.9 sa matag babaye.
Kini nga numero ubos sa replacement level-usa ka positibo nga timailhan sa pag-uswag sa demographics sa nasud.
Sumala sa datos sa CPD, 34.48 percent sa mga babaye mas gusto nga mogamit og mga pills isip ilang contraceptives, nga naghimo niini nga labing popular nga pamaagi.
Gisundan kini sa mga injectable nga adunay 20.66 percent ug lakip niini ang pagtaas sa paggamit og implants isip laing pmaagi usab sa contraceptives.
Ang executive director sa CPD, Undersecretary Lisa Grace Bersales nihatag og gibug-aton sa kamahinungdanon sa padayon nga pagsiguro nga ang mga panginahanglan sa kababayen-an matubag aron ilang makab-ot ang ilang mga katungod, lakip ang ilang abilidad sa pagdesisyon sa gidaghanon ug gilay-on sa ilang mga anak.
Nga anaa sa Philippine Population and Development Plan of Action (PPD-POA) 2023-2028 nga nagtumong sa pagsuporta sa katungod sa kababayen-an sa tibuok nasud.
Kini naglakip sa (1) pagplano sa pamilya, (2) pagsuporta sa kahimsog sa mga batan-on, (3) pagpasiugda sa responsableng pagplano sa pamilya, (4) paghatag og gahum sa mga mamumuo, ug (5) pagpasiugda sa aktibo ug himsog nga estilo sa kinabuhi sa mga tigulang.
Ang PPD-POA nakatutok usab sa pagpaspas sa kalamboan sa mga marginalized sector dinhi sa Pilipinas.
Samtang, ang komisyon nagpadayon sa iyang mga paningkamot sa pag-optimize sa mga oportunidad sa demograpiko samtang nagtubag sa mga isyu ug mga hagit sa populasyon, ilabi na sa mga babaye sa Pilipinas, aron mapauswag ang kalidad sa kinabuhi sa mga Pilipino.
