CEBU CITY – Giisip sa usa ka mental health expert nga ‘alarming’ ang mga nahitabo karun nga paghikog ilabi na sa mga ‘millenials’ nga adunay gihambin nga problema.
Gipahibalo ni Dr. Rene Obra, Center for Behavioral Sciences Chairman, nga sa matag tulo ug tunga sa oras, usa katawu ang maghikog sa Pilipinas, samtang usa sa matag upat ka oras lukop kalibotan.
Gani, matud pa, 50% o usa sa duha katawu ang maghikog apan wala may psychiatric problem, butang nga matawag ug ‘alarming’.
Giingung ang tawo nga kanunay nang maghinuktok, nagpabaya sa kaugalingon, dili na maka-focus, iritabli o dali nga masuko, dili makatulog o kanunay na lang matulog, dili ganahan mukaon, ingun man nga ubos ang lebel sa performance sa trabaho, klase ug uban pa, ang sigurado nga mga tima-ilhan sa usa katawo nga ‘depress’.
Tambag pa sa eksperto nga kung makita na ang maong mga sinyales hayan mas maayo nga mubisita na ug usa ka mental health expert o mamahimo usab nga manawag sa Tawag Paglaum kung nagkinahanglan ug ka-isturya.
Mamahimo nga manawag sa mga musunod nga cellphone number, 0939 937 5433 / 0939 936 5433 / 0927 654 1629, ug giklaro ni Dr. Obra nga libre lang ang maong serbisyo sa Tawag Paglaum.
Gitawag sa maong doctor ang paghikog isip “most coward” nga pamaagi sa pagsulbad sa problema.
Nagkanayon kini ang tanang tawo adunay problema ug nagdepende na lang kini sa pamaagi sa pag-atubang sa problema ug ang paghikog ang dili gayud solusyon.
