Napun-an ang ihap sa mga indibidwal nga namatay sa paghapak sa bagyong Yagi sa pipila ka mga nasud sa Southeast Asia.
Basi sa datos nga gipagawas sa ASEAN Coordinating Center for Humanitarian Assistance, kapin sa 500 ka mga tawo na ang nangamatay tungod sa kusog nga pag-ulan, pagbaha ug pagdahili sa yuta nunot sa pagkaguba sa kusog nga bagyo.
Sa nasod sa Vietnam, ang labing daghang kaswalti nga natala kay miabot sa halos 300 ka tawo.
Samtang sa Myanmar, 226 ka tawo ang namatay samtang 77 ka tawo ang nagpabiling missing.
Ingon man nga adunay 42 ka tawo ang kompirmadong patay sa Thailand, 21 sa Pilipinas, ug upat sa Laos.
Matod sa ahensya, minilyon ka mga tawo ang naapektuhan sa pag-igo sa maong bagyo, diin sa Myanmar pa lang, 3.4 na ka mga tawo ang namakwit.
Bisan pa man og grabe kining bagyo sa miaging semana, niresulta kini sa dugay nga pagbaha sa nagkalain-laing dapit sa maong mga nasud ug gisundan usab kini sa pag-ulan.
Daghang importante nga mga estraktura ang nangaguba sama sa mga dalan, taytayan, mga power tower, ug mga telecom tower, uban sa liboan ka relihiyosong mga bilding, eskwelahan, ug mga opisina sa gobyerno.
