Nisaka ang ihap sa mga namatay samtang kapin sa 300 ka mga tawo ang nagpabiling Nawala o missing human sa dakong sunog nga miulbo sa usa ka taas nga residential building sa Hong Kong niadtong Miyerkules, Nobyembre 26.
Sumala sa lokal nga mga awtoridad, 83 ka mga tawo ang namatay sa dapit sa sunog samtang upat ang namatay sa ospital ug usa ka bombero ang namatay usab.
Sumala sa mga opisyal, ang sunog milamoy sa pito sa walo ka tower blocks sa distrito sa Tai Po. Bisan pa, upat ka tower ang gideklarar nga kontrolado na, samtang ang mga paningkamot gihimo aron mapalong ang ubang mga building nga nagdilaab pa.
Ang sunog kaniadto gipataas sa level five, nga giisip nga “most serious level” sa Hong Kong.
Tulo ka mga construction company executives ang gidakop usab tungod sa pagduda sa manslaughter ug gross negligence nga may kalabotan sa pagkadiskobre sa mga materyales nga dali masunog, lakip ang mesh ug plastic sheets sa mga bintana sa mga building, nga mahimong hinungdan sa paspas nga pagkaylap sa sunog.
Nagpadayon ang imbestigasyon sa hinungdan sa sunog nga miulbo sa usa ka housing complex nga giayo.
Gatusan ka mga residente ang gipabakwit ngadto sa temporaryong mga kapasilongan samtang ang mga emergency housing unit gitukod alang sa uban nga naapektuhan sa sunog.
