Mokabat sa 75 ka mga reklamante gikan sa nagkalain-laing sektor ang misang-at sa ikaduhang impeachment complaint batok kang Bise Presidente Sara Duterte tungod sa pagluib sa pagsalig sa publiko tungod sa giingong sayop nga paggamit sa P612.5 milyones nga confidential funds.
Diin pormal na usab kining gidawat ni House Secretary General Reginald Velasco ang mga giduso sa Makabayan Bloc.
Ang impeachment complaint nagsentro sa tulo ka mga alegasyon, nga naglakip sa “abuse, misuse, and wastage” sa confidential funds.
Ingon man ang sistematikong pagtakuban sa maong mga aksyon pinaagi sa hinimo-himo nga accomplishment reports, resibo, ug mga dokumento nga gisumiter sa Commission on Audit (COA) ug tinuyo nga pagbabag sa imbestigasyon ug pagdumala sa kongreso.
Si Velasco niingon nga ang reklamo iproseso subay sa Article XI, Section 3 sa 1987 Constitution ug sa Rules of Procedure on Impeachment Proceedings.
Ug ipasa na kini sa Office of the Speaker alang sa dugang aksyon.
Gipasalig ni Velasco sa publiko nga ang proseso sa impeachment ipahigayon uban ang integridad, gigiyahan sa mga prinsipyo sa hustong proseso ug pagsunod sa Konstitusyon.
