CEBU CITY-Mopahigayon og candlelight prayer rally si kanhi Presidente Rodrigo Duterte dinhi sa dakbayan sa Sugbo, diin iyang ipasiugda ang Transparency, Accountability, Peace and Security, o TAPS, sa entertainment grounds sa SRP duol sa usa ka dakong mall karong umaabot nga Pebrero 25, o ang anibersaryo sa Edsa People Power Revolution.
Mao kini ang gitino ni Atty. Irene Anne Caballes, ang lead convenor sa Cebu coalition for transparency accountability, peace and security, diin nagtugot sa mga tawo nga nagsuporta sa Konstitusyon nga makaapil sa nasangpit nga prayer rally aron tinguhaon nga ibutyag ang makaluluoy nga kahimtang sa politika ug ekonomiya sa nasud.
Gani, ang nga katuyuan sa naasoy nga aktibidad ang pagpakita sa pagsupak sa People’s Initiative nga nagtumong sa pag-amendar sa Konstitusyon.
Kalabot niini, nasayran sa Bombo Radyo Cebu Newsteam ang gihimong pagpangandam sa kapolisan dinhi sa Sugbo aron masiguro ang seguridad ilabi na nga daghan ang mga dumadapig sa kanhi presidente.
Subay niini, gikuhaan og pamahayag ang sakop sa kapulisan sa Sugbo alang sa ilang pagpangandam sa umaabot nga kalihokan.
Diin gipaambit ni Police Col. Ireneo Dalogdog, ang hepe sa CCPO nga andam ug anaa sa full-alert status ang sakop aron masiguro ang seguridad ug kalinaw sa mahitabong prayer-rally.
Gani, adunay gibana-banang 150 ngadtu na sa 200 ang ipakatap nga mga police personnel.
Nasayran usab nga mosalmot ang mga sakop sa Gabinete, mga retiradong heneral sa militar ug kapulisan, ug ubang mga lider nga naghiusa sa pagsuporta sa kanhi Presidente.
