TEXAS-Usa ka nitezen ang nakahigayon og video ug gipost pa sa social diin ang usa ka ilaga mi-ambak sa fryer nga dunay nagbukal nga mantika human nga kini dakpon unta sa usa ka staff sa Whataburger restaurant sa Bastrop, Texas.
Nakita sa maong video nga kuha ni Brushawn Lewis nga dunay ilaga sa counter diin nahimutang ang mga pagkaon nga lutoonon, butang usab nga gikabalaka ug gilood ang mga customers.
Mabati sa background sa maong video ang tingog sa usa sa staff nga nangutana kung kinsa pa ang gusto nga makuha ang ilang kwarta isip ‘refund’.
Sa dihang dakpon na unta sa staff ang ilaga, mi-dive hinoon ang ilaga sa fryer nga dunay nagbukal nga mantika para lutu-an sa mga french fries.
Ang maong post miabot na og 1.4 million views sulod lamang sa 24 hours ug duna na kini 50,000 shares.
Samtang mipagawas usab og statement ang Whataburger Restaurant nga ilang gisira ang ilang kan-anan para sa pest control. Apan gitino sa management nga ang ilang kan-anan limpyo sukad pa sa una ug kini ang unang higayon nga nahitabo nga dunay nakit-ang ilaga sulod sa ilang kan-anan.
