Giguba sa Barangay Jubay sa lungsod sa Liloan sa amihanang Sugbo ang mga illicit nga mga vape products nga nasikop sa Bureau of Internal Revenue (BIR) Central Visayas.
Kini isip kabahin sa nationwide destruction sa maong illegal nga produktong vape sa BIR karong adlaw sa Lunes, Disyembre 15.
Sumala pa sa pakighinabi sa Bombo Radyo Cebu News Team kang Bernardino Paul Somera Jr., ang Chief Regional Investigation sa BIR Central Visayas nga ang mga gigubang illicit vape products sa Liloan kay gilakipan sa mga produktong nasikop sa rehiyon sa Western Visayas ug Negros Island Region.
Nahimong illicit ang mga produkto kung sa higayong dili kini musubay sa tukmang proseso sa pagbayad sa buhis susama sa walay tax stamps ug dili rehistrado sa BIR diin kini ang ikaduhang tuig nang nagpanikad nga operasyon sa ahensya.
Ang mga nagubang illicit vape products kay mga nakolekta sukad pa niadtong nakalabayng tuig 2024.
Sa Sugbo lamang, adunay kapin 7,000 ka mga units sa vape products ang nahipos sa ahensya nga ang balor mubana-bana sa P27-28 milyones sa excise tax, surchage ug administrative penalties due ingon man sa tulo ka rehiyon lakip ang Western Visayas, Negros Island Region, ug Central Visayas kay anaa sa 15-16,000 units ang nahipos diin ang balor muabot sa kinatibuk-ang P52 milyones.
Ang mga nasikop nga mga tag-iya sa mga illicit vape products kay gipasakahan na og kasong tax evasion tungod sa paglapas niini sa lagda sa balaod sa buhis.
Mensahe sa buhatan sa publiko ilabi na sa mga nag-negosyo og mga produkto kay isigurong rehistrado kini sa BIR og nagbayad sa tukmang buhis aron dili kini makalapas sa balaod nga nagtinguha sa patas nga kompetisyon sa pamatigayon sa merkado.
